冷清清

今天公司有一半人無返工, 有些已預先取了事假、有些臨時打電話回來說要取 urgent leave、取病假, 而返了工的同事好像也沒有以前的起勁, 整個辦公室變得靜了下來, 十分冷清, 恍惚好像將要停止運作的樣子, 莫非各人都需要冷靜一下, 調適情緒?

大執位

今天公司有個傳聞, 我的部門短期內將會大執位, 有些人將會調走, 有些新人將會加入, 而留下來的舊人將會再執過位, 重新分配工作, 初步知道調走的人不會是我, 亦即是說留下來的我將會被分配一份新工作, 聽聞這份工作的性質是全個部門最惡哽的, 包括:
1) 工序繁複, 一個不小心好易會出錯, 做錯後當然會俾人插啦, 所以會好大壓力,
2) 工序中要完全跟著某些 due date  or dead line 來辦理, 不可以提早做, 更加不可以遲做, 要睇到實一實, 碰著這些日子一定不可以請假,
3) 其中有些工作是會由其他部門 pass 過來, 如果上一個部門的同事唔生性, 遲遲不 send 過來的話, 到我手上再 follow 的時候便會好趕好趕, 會做到氣咳 ga,
4) 又要和外面的公司聯絡, 
5) 其他部門的同事會經常過來搵料, 又要招呼佢哋,
6) 又要做很多 report 交給上頭過目...

所以知道這個情況後很不開心, 點解調走嗰個唔係我? 點解我會分配到一個最惡哽的崗位? 真係好煩呀  !

見表哥...囉囉攣

稍後五點鐘會出去探財表哥, 首先會上去佢屋企坐吓, 跟著出街吔晚飯 ,  其實好耐以前已打算去探他, 不過一直無行動, 直至上星期, 四家姐同他傾電話閒聊  , 便約好今日過去探他, 數數手指, 我哋都有兩年多無見過面, 唔知他有甚麼改變呢?
香港雖然細, 但有些親戚平時都好少見, 兒時還好, 會跟著爸媽周圍去拜年, 和一些親戚最少一年都會見一、兩次面, 但自從爸媽年紀大了, 他們也少了去親戚家拜年, 而我亦不好意思單人匹馬周圍去拜年, 廢事俾人以為我專登去逗利是  啦.
姨媽 (媽媽的親家姐) 有兩個親生仔: 二表哥、三表哥, 我強調 "親生仔" 是因為姨丈還有另外一個老婆, 她所生的兒子 (大表哥) 和我們很少見面, 所以並不熟絡, 幾個表哥中, 以財表哥和我們最熟, 因為財表哥以前住在我家附近, 間中他會上來我家坐, 過年時, 他總是第一個來我家拜年的表哥, 所以媽媽時常讚他乖.

幾年前表哥搬了家, 其後我們也搬了家, 在越搬越遠的情況下, 平日各有各忙, 所以近年和他少了見面, 希望一陣子見面時, 唔會變得太生外吧   .

廣旅集團大廈29/F乃欺騙公司

 十多日無寫過 Blog, 一來公司比較忙, 二來諗唔到寫乜題材好, 三來放了幾天復活節假期, 順便籍機偷下懶囉
今早返到公司, 見到幾個同事圍埋一齊係咁傾, 以為他們講緊乜嘢大新聞, 走埋去八一八, 原來其中有個同事的屋企人(簡稱: X 小姐) 被一間公司欺騙了, 於是乎發起各同事, 齊齊唱衰那間行騙公司, 以免其他人再度受騙, 我當然會支持那位同事的發起行動, 在此把 X 小姐的經歷, 提供給各位網友參考, 並引以為鑑.

公司名稱: 皇廷國際渡假公司 Emperor Regency International Ltd
地址: 香港銅鑼彎邊寧頓道 18 號 廣旅集團大廈 29/F 全層

轉貼行騙個案:

X 小姐近日收到一間公司的職員打電話給她，說她之前做左份問卷調查, 而家送返 D 禮品給她, 叫她上去銅鑼彎邊寧頓道 18 號廣旅集團大廈 29/F 簽收禮品, 禮品可以 5 選 2:

1.東南亞任何地區 ge 指定酒店(一星期住宿)
2.$500 機票現金卷
3.修身美容現金卷
4.四人遊輪之旅 2 日 1 夜
5.百佳禮卷 ($50 至 500).

該職員聲稱 X 小姐攞禮品前要先聽一個 90 分鐘的講座, 聽完後便可以領取已揀選了的禮品.
X 小姐依約到達該公司後, 該公司安排了一位職員, 單對單向她不停推銷旅遊會籍, 她聽了兩個半小時後, 該公司職員仍然繼續推銷, 無意結束他們所謂的講座, X 小姐於是乎表明他們的產品不合用, 要求領取禮品離開, 那職員見無生意, 立即變面, 籍詞 X 小姐未能完成整個講座程序, 而拒絕送出禮品, 並遊說 X 小姐繼續完成埋個講座, X 小姐便問那職員還需要幾多時間, 而那職員無正面回覆還需要幾耐, 只是要求 X 小姐必須和他們合作, X 小姐立即氣上心頭反駁說: 甚麼未能完成整個講座程序? 甚麼才算和你們合作? 原先講明聽的講座只要 90 分鐘, 現在兩個半小時已過啦, 唔通你哋講天光我都要繼續聽? 並再次要求立即領取禮品然後離開, 但那職員好似聾耳陳一樣, 不肯交出禮物, X 小姐這時才恍然大悟, 原來又是一間騙人公司, 他們跟本不會有任何禮品送出, X 小姐俾人耍了成晚, 心有不忿, 決定即時報警舉報該公司.

事後她回到家中, 上網 check 該公司資料, 原來該公司一直都是騙人的, 很多有關於他們騙人的報導已擺了上網, 並且臭名遠播, 所以各位網友如遇有同類事件, 不防先上網搜查資料, 切勿受騙啦!

 

正所謂: 邊 有 咁 大 隻 "甲 那" 隨 街 跳!

 

其他受害者個案:

http://www.9394club.com/newbbs/viewthread.php?action=printable&tid=2122

http://www.xanga.com/flora18
http://www.singpao.com/20050207/local/672676.html
http://syhlai.mysinablog.com/index.php?op=ViewArticle&articleId=180378


 (P.S. 該公司行騙個案太多, 不能盡錄, 只選取部份, 各位網友如有需要, 可上網再搜查.)

南非海豹島

海豹島 (Seal Island) 是一座位於 Hout Bay 海灣上的小島，因為島上有數以千隻的海豹與海鷗而聞名。遊客乘船前往這個小島，可以近距離觀看海豹、海鷗與其他海鳥的生態。

看著這些海豹, 會使我聯想起香港的 Ocean Park, 不經不覺, 原來香港海洋公園剛慶祝完 30 大壽, 記得讀中學時, 有一年學校大旅行, 正是去海洋公園參觀, 記得當時海洋公園的規模無現在的大, 只有幾個主題館: 海洋劇場、海洋館、鯊魚館及海濤館...等等. 那時, 其它配套設施不多, 記得的還有雀鳥劇場、經典的旋轉木馬...等等, 所以遊客大都在幾個主題館裡轉.

 

印象較深刻的有海洋劇場, 裡面有海獅、海豚和殺人鯨表演, 殺人鯨海威跳出水面頂波, 頂完波後撻番落水, 水花濺高十多廿呎, 可想而知他的體重是多麼有份量啊 ~.~

 

而自小便喜歡睇魚和養魚的我, 最鍾意當然係海洋館, 因為館中有成千上萬的魚群, 游來游去, 每分每秒的景象也不同, 真是千變萬化, 目不暇給. 其後每次重遊海洋公園, 我都會留係海洋館好耐, 因為乜嘢魚我都鍾意睇 ga, 而且會越睇越興奮, 睇極都唔會厭添...  !

可惜自從水母館開了後, 還未去過呢, 真希望今年內可以重遊海洋公園, 再次近距離欣賞這些海洋生物.