前日入紙攞了月中幾日假, 今天臨急臨忙走去報團.
去旅行社前, 隨便上網看看, 仍未能決定去那裡玩, 因為離出發日期的確時日無多, 恐怕想 join 嘅團已 full 咗或者已經截團, 所以都無謂花太多時間逐一比較, 一於去到旅行社才諗吧.
在同一個商場內, 走訪幾間旅行社, 的確, 可以選擇的團號果然跟網上看到的大打節扣, 但價錢大都比網上列出的為貴, 相信是那些乜乜超值團 / 推廣團一早已 full 晒吧!
以下是報團情況:
1) 永X
近幾次去旅行都是跟它, 所以第一間便入去問, 埋到櫃位, 男職員很年青.
去年去韓國, 食住 OK, 依出發那幾天日子問問他韓國有乜嘢團揀? 他介紹今年有個新團號去寧越 + 首爾五天, 第一
、二天玩寧越, 他還 load 手機相片我哋睇, 自然風景, 啱我哋喎, 可惜跟住3 日首爾行程, 大部分去年已玩過, 又有很多購物點
.
再問問馬來西亞有乜團可以報 (去年都諗過去, 後來揀了去韓國睇紅葉) , 他介紹一個美食團, 話食住唔錯喎, 團費當然高過那些超值團 / 推廣團啦, 再問問東北長白山, 他介紹一個 8 天團, 回來第日即刻要返工, 于是乎話再睇睇行程諗諗先, 啱的話稍後回來再搵你.
2) 康X
埋櫃位問到一個大嚿佬, 一講個出發日期, 他就話我哋遲報團, 我心諗, 咁係唔係乜團都 full 晒唔再收客呀!, 問韓國團 - 他介紹濟州; 問長白山 - 同樣介紹一個 8 天團, 行程寫明需要步行梯級登山, 約一千多級, , 部分車程很長 (5 小時); 再問馬來西亞團時, 他又再話我哋報得遲,叫我哋不如睇睇剛才兩個行程先啦, 明顯已唔想介紹另一個團, 服務態度真係麻麻
, 見你無心介紹時, 我哋亦唔一定要幫襯你嘅.
3) 中X
跟中X, 我哋只會報中國大陸團, 問過幾個地方: 長白山
、南寧
、華東... 都話未成團, 唔係嘛, 隔離猛話我哋報得遲, 你哋就猛話未成團要等.
4) 星X
商場中最後一間旅行社, 職員大部分時間坐冷板凳, 客人只得小貓一
、二, 見唔使等, 又入去問一問. 職員服務態度還好 (好過贊助 X 姐那間), 但近幾年報團經過, 見到他們都係無乜客, 所以無信心 join 佢哋.
攞齊幾間料, 行埋一邊再睇睇, 最後下了決定回去永X 報團, 去到門口, 有幾個客排緊隊, 心諗可能去唔番剛才個 counter 搵那個哥哥仔, 哈! 最後又俾我哋輪番去嗰個位, 既然剛才己問過資料, 便直接話俾他聽我哋報馬來西亞那一個團, 他便幫我哋入單, 當辦緊手續時, 突然有一個男職員伸個頭埋嚟望, 死伙! 望真 D 才知認錯人, 原來呢位哥哥仔才是最先接待那一位職員, 他望吓我哋張單好無癮頭耷耷咁走開, 唉! 兩位同樣年青, 又坐同一個位, 我哋無刻意避開你找其他人開單呀, 只是你走開咗, 陰錯陽差幫唔到你開單交功課啫, 惟有在心裡面講番聲 sorry 囉.
