遲來的秋遊

每年去旅行都喜歡選擇秋季, 但今年遲了攞假, 令出發日期已踏入早冬季節, 一向怕凍的我, 報團時唯有避開那些較北的地方.

 1 st choice: 越南

本來考慮越南, 但旅行社職員話有很多長途車, 同行友伴又唔喜歡坐長途車, 越南只好留待日後有機會時再去吧!

2 nd choice: 韓國

雖然前兩年都去過韓國, 本來我唔介意今年再去韓國, 因團費及使用在預算之內, 團餐一般都 OK,  環境又比較清潔, 但睇過行程後, 同行友伴又話景點來來去去都差不多, 購物點又多, 他們又不讚成.

3 rd choice: ???

同行人士建議去日本, 本來我怕凍無唸過冬天去日本, 他們提議可以去九州, 因天氣會比北海道及本州暖, 而且南方仲有機會睇到紅葉, 雖然有一位友伴幾年前去過, 但她不反對再去九州, 只要唔好揀樂園團便可以了, 經過一輪研究多間旅行社的多個團號行程, 最終揀了一個南北九州睇紅葉團.

日本團, 在我眼內一向都是大出血團: 和牛, 魚生, 壽司, 拉麵... 各款美食等緊我哋; 再加上各式各樣的精緻手信禮品, 今次團費及使用肯定會超出了原先的 Budget, 不過使咗又可以搵番啫, 此時此刻, 要好好享受那未出發先興奮的感覺!

 

一波多折之搬 blog 記

自從 8 月底 Yahoo 宣佈摺 blog, 為了搬 blog 真係攪餐矇, 幾經辛苦表面上好似已經成功咗, 其實暗地裡還有很多問題未解決.

搬 blog 時曾遇到的難題:

1) Yahoo blog 第 1 次下載失敗, 要寫 email 去 Yahoo, 要求他們再下載新檔案給我.

2) 第 1 次把文章匯入 blogspot, 見到有齊 500 多篇舊網誌, 以為成功啦, 但當我睇番以前的留言, 才發覺出現了一個很大的問題, 就係無啦啦留言全部匯入咗舊網文中,  還把網友名稱轉晒做網友的 email address, 全部 show 晒出嚟, 大穫! 容乜易連累 blog 友們的 email 被炸, 急忙收回所有公佈了的文章.

3) 上載三千多張圖片去 Google Drive, 試了幾次 (幾日) 才全部成功.

4) 第 2 次把文章匯入 blogspot, 雖然 blog 友的留言名稱更正番, 但有些留言消失了?

5) 文章只能匯入 300 百多篇, 後來嘗試了多次仍是得 200 / 300 篇出現, 問題在那?

6) 原本 5 位數字嘅總瀏覽量減少了一大截?

7) Set 回應欄位, 嘗試多次仍然 show 唔到出嚟?

不知何時才可以把全部 500 多篇舊網誌文章成功匯到這裡? 極之頭痕哦! 現正密密往 blog 友們的網誌中取經, 希望盡快找到解決方法, 能成功發佈全部舊網誌文章吧.

十分佩服其他 blog 友們能快速地成功搬 blog! 謝謝他們無私地提供搬 blog 貼士!