過澳門 遇貴人

近日不停落雨, 早上起來陽光普照, 便決定往澳門辦些事, 出到上環港澳碼頭已 9 點幾, 最快開的兩班船已 full 咗, 櫃台開賣最早的船票只有 10:35, 雖然好晏, 唯有照買 ($134/位) , 去到澳門, 過關時又大排長龍, 入境後便去兌換店換澳門 $, 人少少; 但效率超慢, 又花了半粒鐘, 然後去的士站等車, 我哋一行五個人, 為了慳錢, 故此要截一部大 Taxi , 在的士站送走了十多部 4人 Taxi 後, 終於見到部大 Taxi, 它外貌有些似香港的客 van 仔, 上車後發覺內隴好大, 可以放很多行李, 不過我哋無行李, 所以坐得好鬆動、好舒服!

$31 去到思親園門口, 落車後只見重門深鎖, 才知道思親園休星期一, 好玩嘢啫, 無啦啦點解會休星期一  , 我們幾個人尊登請假, 一場來到食白果! 唔憤氣於是走過隔離一間 xxx 機構問人, 透露我們山長水遠由香港過來辦些事... ...,  結果有兩個好心人教我哋可以過去鏡湖醫院, 那邊有個辦事處沒有休息. 嘩! 好彩問一問, 原來如此! 謝過他們後, 便先在附近的茶餐廳醫肚.

食飽飽後坐 17 號巴士 ($2.5/位) 去鏡湖醫院辦了一些初步手續, 那裡的職員知道我哋來自香港後, 特別和思親園那邊的工作人員通電話, 然後著我們馬上折返思親園找 x 先生, 說他會協助我們辦埋其他手續, 謝過他後出來截 Taxi, 但部部 Taxi 都有客, 見到有部 17 號巴士埋站, 不理三七廿一, 衝上去問司機, 搭幾號車返去思親園, 司機話 17 號是巡環線, 兜兜吓會去返思親園那個站 (大約四、五十分鐘後), 但他說思親園後面兩條街有個站, 建議我們從那裡行過去會快好多, 於是乎請司機到站時叫我們下車, 在車上有兩、三個乘客好熱心, 教我們下車後怎樣行... 怎樣行, 聽著... 聽著話咁快便到站.

在思親園辦完正經事後, 只是 4 點幾, 一場嚟到, 點都要周圍行吓嘅, 在路邊問人坐乜嘢車去漁人碼頭, 她又好熱心咁帶我們行到路口的巴士站, 教我們坐 13 號巴士, 等車時看見另一個巴士指示牌, 原來 8 號都啱, 剛剛睇完,  8 號便有車, 照舊 $2.5/位, 好抵! 途經新口岸, 永利、葡京 (發覺後面多咗間新葡京)、星際..., 間間新酒店都好有氣勢、好 sharp, 多年無來過, 現時的新口岸已密密麻麻, 不再是我記憶中的面貌了!

在金沙娛樂埸下車後, 影了一些相, 便步入對面的漁人碼頭, 在路口見到另一間娛樂場 - 巴比倫, 再向前走, 不久開始間歇性下雨, 行吓停吓, 索性在懷舊一條街坐低, 吃了一些糖水、小食. 吃完後過去唐城 (Tang Dynasty), 途中又望到另一間娛樂場 - 金龍, 原來澳門賭場真係咁多嘅  . 來到岸邊, 看著澳氹大橋的夜光 - 幾靚! 但對出遠處的海面卻烏雲密佈, 不斷行雷閃電, 我們意識到狂風暴雨即將來臨, 於是決定唔再行了, 即刻走, 往隔離碼頭坐 8:15 夜船 ($176/位) 返香港, 就此結束澳門短短一天之行程.

返到香港, 原來香港亦落大雨, 不久再轉埋黃雨添.

咁大雨, 好彩走得快, 不然留在澳門必定會做落湯雞!